#廣告辛談：鞏固，還是開拓好？（附【2015全聯經濟美學】廣告全集）
香港惠康VS台灣全聯。
十大明星VS十五素人。
論牌面，前者（http://on.fb.me/1ynvchc ）一定贏晒，因為網羅咗「康哥」胡楓、「惠姐」羅蘭、成日問典解嘅吳若希、好可愛嘅蔣志光，仲有惠康fb專頁所有留言都關佢事嘅鄭俊弘。
但講真，惠康個故仔都幾不可思議：講惠康一班職員，為咗紀念「康哥」同「惠姐」相識70年，特登同「康哥」夾埋，收埋隻70周年項鏈喺啲貨品度，等「惠姐」去發現。
不可思議在：惠康職員會為咗一對街坊做咁多野，仲阻止其他顧客去事發現場搞亂檔？分店經理都唔會畀職員咁大細超啩？
所謂睇故唔好駁故，但，我去惠康，見親嘅職員大多係新移民，同啲街坊係咪真係有咁深厚感情呢？廣告投射嘅街坊街里打成一片形象，與現實中大型超市職員同顧客嘅疏離關係完全係兩碼子事，我好難投入個故仔度咯！
事實上，呢個廣告只係利用一班入屋TBB明星去討大家（特別係班師奶客）好感，本身果句「70年至like 依然」，其實有點自說自話，係咪至like，問下自己就知。
至於台灣全聯嘅廣告，冇10大明星，得15位20多歲嘅年青素人。佢哋分別擔綱14條廣告，片中旁白嘅思維，其實同年青人嘅主流行為有啲背道而馳：
「長的漂亮是本錢，把錢花的漂亮是本事」、「來全聯不會讓你變時尚，但省下的錢能讓你把自己變時尚」、「真正的美是像我媽一樣有顆精打細算的頭腦」、「知道一生一定要去的20個地方之後，我決定先去全聯」、「我可以花八塊錢買到的為什麼要掏十塊錢出來」⋯
呢啲旁白，歌頌嘅係慳得一文得一文、格價要格到至抵嘅行為。好多年青人講求嘅係方便，買少少野只會行入就近嘅便利店，為慳錢入超市買嘢，唔係好型咯！
但，全聯就係識得用一句句小清新嘅文案，將「慳錢」呢種老套思想重新演繹，塑造成一件好潮、好文青嘅事，完全脗合佢哋提倡嘅「看見鐵草莓消費新思維」Tagline。
一港一台，一個鞏固現有師奶客路，一個開拓年青消費族群。你話你會為俊弘哥去多啲惠康，少啲去阿信屋？好，我信，我信咯！
作者：辛達
影片出處：http://bit.ly/1FBqHNf
不想錯過廣告狂人文章，可Click我們這個專頁的like掣，再點選「接收通知／Get Notifications」。
follow 廣告狂人instagram:
http://instagram.com/madmanmonogram
Search